राज्याचे उपमुख्यमंत्री आणि शिंदे सेना प्रमुख एकनाथ शिंदे यांच्या शासकीय वाहनाला बॉम्बने उडवण्याची धमकी दिल्याच्या प्रकरणी गोरेगाव पोलिसांनी कारवाई करत बुलढाणा जिल्ह्यातील देऊळगाव मही येथून दोघांना २१ फेब्रुवारी रोजी सकाळी ताब्यात घेतले. प्राथमिक तपासात ताब्यात घेतलेले दोघेही नात्याने आतेभाऊ-मामभाऊ असल्याचे समोर आले आहे.
२० फेब्रुवारी रोजी मुंबईतील काही पोलिस ठाण्यांना उपमुख्यमंत्री एकनाथ शिंदे यांच्या वाहनाला बॉम्बने उडवण्याची धमकी मिळाली होती. या प्रकरणी गोरेगाव (मुंबई) पोलिस ठाण्यात भारतीय दंड संहितेच्या विविध कलमांतर्गत गुन्हा नोंदवून पुढील तपास सुरू आहे.
गोरेगाव पोलिसांनी ताब्यात घेतलेल्या आरोपींची नावे मंगेश अच्युतराव वायाळ (३५) आणि अभय गजानन शिंगे (२२, रा. देऊळगाव मही, जि. बुलढाणा) अशी आहेत. मंगेश हा ट्रक चालक असून, अभयचे मोबाईल शॉप असल्याची माहिती समोर आली आहे. प्राथमिक तपासात दोघांमध्ये आपसातील वाद झाल्याने एकमेकांवर कुरघोडी करण्याच्या उद्देशाने त्यांनी ही धमकी दिल्याचा पोलिसांचा संशय आहे. मात्र, या प्रकरणाचा अधिक सखोल तपास सुरू आहे.
गोरेगाव पोलिसांनी दोघांना ताब्यात घेऊन मुंबईला हलवले असून, तेथे त्यांची सखोल चौकशी सुरू आहे. सार्वजनिक सेवकाला कर्तव्य पालनात अडथळा निर्माण करण्याच्या उद्देशाने धमकी दिल्याचा आरोप असल्याने ही कारवाई करण्यात आली आहे.
तपासादरम्यान अभयने मंगेशच्या मोबाईलचा वापर केल्याचे उघड झाले आहे. मात्र, प्रकरणाच्या संवेदनशीलतेमुळे पुढील तपासात पोलिसांची भूमिका काय राहील, याकडे सर्वांचे लक्ष लागले आहे.
