बीड जिल्ह्यातील मस्साजोगचे सरपंच संतोष देशमुख यांच्या हत्येच्या प्रकरणात मुख्य आरोपी असलेला वाल्मीक कराड याच्यावर मकोका कायदा लागू करण्यात आला आहे. हे प्रकरण राज्यात चर्चेचा विषय बनलेला असून, दररोज नवनवीन खुलासे समोर येत आहेत. विरोधक महायुती सरकारवर आणि गृहमंत्रालयावर गंभीर आरोप करत आहेत. या प्रकरणातील एक आरोपी अद्याप फरार आहे, ज्याचा शोध घेतला जात आहे. खासदार बजरंग सोनावणे यांनी पुन्हा एकदा महायुती सरकारवर ताशेरे ओढले असून, सरकारच्या कारभारावर तीव्र टीका केली आहे.
खासदार बजरंग सोनावणे यांनी याबाबत गंभीर प्रश्न उपस्थित केले. त्यांनी म्हटले की, फरार आरोपीला पकडणे अत्यंत गरजेचे आहे. पुणे कनेक्शन तपासण्याचा इशारा त्यांनी आधीच दिला होता, आणि आता पुण्यातून दुसरा आरोपी पकडला गेला आहे. तसेच, पोलिसांना अनेक दिवसांपासून मोबाइल डेटा का सापडत नाही, हा एक मोठा संशोधनाचे मुद्दा आहे, असे त्यांनी स्पष्ट केले. तसेच, बजरंग सोनावणे यांनी सरकारच्या सुरक्षा व्यवस्थेवर टीका केली आणि म्हटले की, आमच्या सुरक्षेची जबाबदारी सरकारची आहे, आणि काय निर्णय घ्यायचा हे सरकार ठरवेल.
जर कोणाच्याकडे अवैधरित्या मालमत्ता असेल, तर त्या बाबत चौकशी होणे आवश्यक आहे. याशिवाय, १०० कोटींपेक्षा मोठ्या प्रकरणांमध्ये ईडीचा हस्तक्षेप नेहमीच होतो. माझे आयुष्य खुल किताब आहे. “माझ्या बाबत जे काही प्रकरण उचलायचं असेल, ते उचला,” असे त्यांनी सांगितले. पंकजा मुंडे यांच्या कामाबद्दल बोलताना सोनावणे यांनी नमूद केले की, पाच वर्षे त्या कामापासून बाजूला होत्या, आणि आता कामात सक्रिय झाल्या असतील. त्यामुळे त्यांना परळीच्या परिस्थितीची माहिती नसेल. परळीच्या शांततेची जबाबदारी त्या भागातील लोकप्रतिनिधींची आहे, आणि लोकप्रतिनिधींनी त्यांची जबाबदारी झटकून चालू शकत नाही, असे सोनावणे यांनी सांगितले.
दरम्यान, धनंजय मुंडे यांनी वाल्मीक कराडच्या कुटुंबाची भेट घेतल्याचा दावा नाकारत सांगितले की, ते वाल्मीक कराडच्या कुटुंबाला भेटले की नाही हे त्यांच्या वैयक्तिक निर्णयावर आहे. संतोष देशमुख यांच्या कुटुंबाला सांत्वन करण्याची गरज होती, ज्याला पंकजा मुंडे आणि धनंजय मुंडे यांनी दुर्लक्ष केले. संतोष देशमुख यांची हत्या झाली आहे, आणि त्या कुटुंबीयांना धीर देणे आवश्यक होते, असे सोनावणे यांनी सांगितले.
