दिल्ली विधानसभा निवडणुकीत इंडिया आघाडीतील तणाव वाढला असून काँग्रेसला मोठा धक्का मिळाल्याची माहिती समोर येत आहे. समाजवादी पक्ष आणि तृणमूल काँग्रेसनंतर आता उद्धव ठाकरेंच्या शिवसेना पक्षानेही काँग्रेसला पाठिंबा देण्यास नकार दिला आहे आणि अरविंद केजरीवाल यांच्या आम आदमी पक्षाला समर्थन जाहीर केले आहे. त्यामुळे इंडिया आघाडीतील पक्षांची धुसफूस वाढली असून काँग्रेस एका बाजूला पडली आहे.
दिल्ली विधानसभा निवडणुकीत तिरंगी लढत होत असल्याचे चित्र समोर येत आहे, कारण ममता बॅनर्जीच्या तृणमूल काँग्रेसनंतर उद्धव ठाकरेंच्या शिवसेनेनेही काँग्रेसला मोठा धक्का दिला आहे. उद्धव गटाचे खासदार अनिल देसाई यांनी जाहीर केलं की, शिवसेना दिल्ली विधानसभा निवडणुकीत अरविंद केजरीवाल यांच्या आम आदमी पक्षाला पाठिंबा देत आहे. त्यांनी याचे कारण स्पष्ट करताना सांगितले की, “आम आदमी पक्षाने महाराष्ट्रातील निवडणुकीत शिवसेनेला पाठिंबा दिला होता, त्यामुळे आम्ही आता त्यांना समर्थन देत आहोत.” यामुळे दिल्लीतील राजकीय समीकरणे आणखी जटिल होण्याची शक्यता आहे.
महाराष्ट्रातील काँग्रेससोबत शिवसेनेचा मित्रपक्ष असताना दिल्लीतील निवडणुकीत आम आदमी पक्षाविरुद्ध काँग्रेस लढत असल्याबद्दल अनिल देसाई यांनी एक महत्त्वाची प्रतिक्रिया दिली आहे. “दिल्लीमध्ये मतांचे विभाजन होणार नाही,” अशी आशा त्यांनी व्यक्त केली आहे.
ठाकरे गटाचे खासदार संजय राऊत यांनी काँग्रेस आणि आम आदमी पक्षाला एकत्र येण्याचा सल्ला दिला आहे. त्यांनी म्हटले की, “आम आदमी पक्ष आणि काँग्रेसने लोकसभेत एकत्र लढून मोदींना रोखण्यात यश मिळवलं, पण विधानसभेत सध्या जो फ्री स्टाइल कुस्ती सुरू आहे, तो देश पाहत आहे. “चार वर्षांनी जनता आम्हाला प्रश्न विचारेल, कारण आपला विरोधक भाजप आहे, काँग्रेस किंवा आप नाही. देशाला पुढे नेण्यासाठी आपल्याला एकत्र राहणं आवश्यक आहे.”
समाजवादी पक्षाचे अध्यक्ष अखिलेश यादव यांनी दिल्लीतील अरविंद केजरीवाल यांच्या नेतृत्वाखालील आम आदमी पक्षाला पाठिंबा जाहीर केला आहे. अखिलेश यादव म्हणाले, “दिल्लीतील लोकांसोबत होणारा भेदभाव आपण पाहिला आहे. केजरीवालजींचे अभिनंदन करतो की एवढ्या अडचणींनंतरही त्यांची हिंमत कमी झाली नाही. “समाजवादी पक्ष तुमच्या पाठीशी पूर्ण जबाबदारीने उभा आहे, याची मी खात्री देतो. जेव्हा तुम्हाला समर्थन आणि मदतीची गरज असेल, तेव्हा आम्ही नेहमी तुमच्यासोबत उभे राहू.”
तसेच, ममता बॅनर्जी यांच्या तृणमूल काँग्रेसनेही दिल्ली विधानसभा निवडणुकीत आम आदमी पक्षाला पाठिंबा जाहीर केला आहे. तृणमूल काँग्रेसचे नेते कुणाल घोष यांनी याबद्दल प्रतिक्रिया देताना म्हटले, “आम्हाला आशा आहे की दिल्लीतील निवडणुकीत पुन्हा आम आदमी पक्षाचे सरकार येईल आणि भाजप दिल्लीमधून संपूर्णपणे बाहेर पडेल.” यामुळे दिल्लीतील राजकीय वातावरण आणखी रंगतदार बनले आहे.
