नववर्षाच्या पहिल्या दिवशी राज्यातील अनेक मंदिरांमध्ये भाविकांनी आपल्या आराध्य देवतेचे दर्शन घेतले. यामध्ये उपमुख्यमंत्री अजित पवार यांच्या मातोश्री आशाताई पवार यांनी पंढरपूर येथील विठोबाचे दर्शन घेत, त्याच वेळी विठोबाच्या चरणी साकडे घालून राज्यातील जनतेला सुख-समाधान आणि त्यांच्या कुटुंबाच्या एकतेसाठी प्रार्थना केली. त्यांनी विठोबाला अशी विनंती केली की, सर्व पवार कुटुंब एकत्र येऊन वाद दूर करावेत आणि शांततेचे वातावरण निर्माण होवो. आशाताई पवार यांच्या या दर्शनानंतर शरद पवार आणि अजित पवार यांच्यातील एकजुटीबाबत राज्याच्या राजकीय वर्तुळात चर्चा रंगली आहे.
अजित पवारांनी महायुती सरकारमध्ये सहभागी होण्याचा निर्णय घेतल्यानंतर राष्ट्रवादी कॉंग्रेस पक्षात मोठी फूट पडली. यामुळे शरद पवार आणि अजित पवार यांच्यातील राजकीय अंतर अधिकच वाढल्याचे सांगितले जात आहे. लोकसभा निवडणुकीत अजित पवार यांच्या पत्नी सुनेत्रा पवार यांचा पराभव झाला, आणि सुप्रिया सुळे यांना विजय मिळाला. त्याच वेळी, विधानसभा निवडणुकीत अजित पवार यांनी युगेंद्र पवारांचा पराभव केला. या दोन निवडणुकांमध्ये शरद पवार आणि अजित पवार यांच्यात थेट संघर्ष दिसून आला. यानंतर आता अजित पवार आणि शरद पवार यांच्यात पुन्हा एकत्र येण्यावर राजकीय वर्तुळात चर्चा रंगल्याचे समोर येत आहे. यावर भाजपाचे महाराष्ट्र प्रदेशाध्यक्ष आणि मंत्री चंद्रशेखर बावनकुळे यांनी आपली प्रतिक्रिया व्यक्त केली आहे.
चंद्रशेखर बावनकुळे यांना शरद पवार आणि अजित पवार यांच्या एकत्र येण्याबाबत प्रतिक्रिया विचारण्यात आली होती. यावर बोलताना, त्यांनी स्पष्ट केले की, शरद पवार आणि अजित पवार यांच्याबद्दलचा निर्णय ते दोघेच घेऊ शकतात. भारतीय जनता पार्टीला या संदर्भात हस्तक्षेप करण्याची आवश्यकता नाही, कारण त्यांचा निर्णय त्यांच्यावरच अवलंबून आहे. त्यामुळे त्यांच्या निर्णयावर आम्ही काही भाष्य करणे योग्य बरोबर नाही, असे त्यांनी सांगितले.
दरम्यान, संपूर्ण देशात पवार कुटुंबाचे खूप मोठे वलय आहे. मात्र, त्यात अचानक वेगळेपणा निर्माण झाल्याने अनेकांना आश्चर्य वाटले आहे. शरद पवार जेव्हा गंभीर आजाराने ग्रस्त होते, तेव्हा देखील त्यांनी समाजासाठी आणि जनतेसाठी अत्यंत महत्वाचे काम केले. अजित पवार यांच्या कार्याची मान्यता फक्त महाराष्ट्रातच नाही, तर संपूर्ण देशात आहे. शरद पवार किंवा अजित पवार असोत, दोघांना आणि त्यांच्या कार्यकर्त्यांना लोक नेहमीच विनंती करत असतात. शरद पवार आणि अजित पवार यांनी एकत्र यायला पाहिजे, असे नरहरी झिरवाळ यांनी सांगितले होते.
