राज्यात पुन्हा महायुतीचं सरकार आलं आहे. ज्यात देवेंद्र फडणवीस यांनी मुख्यमंत्रिपदाची, तर एकनाथ शिंदे आणि अजित पवार यांनी उपमुख्यमंत्रिपदाची शपथ घेतली आहे. मंत्रिमंडळ विस्ताराची तारीख, कोणत्या पक्षाला किती मंत्रिपदं मिळतील, आणि कोणत्या इच्छुकांना संधी मिळेल याबाबत उत्सुकता वाढली आहे. यावर शिवसेना नेते उदय सामंत यांनी प्रतिक्रिया दिली असून, शिवसेना अजूनही गृहमंत्रिपदाबाबत आग्रही आहे, असा खुलासा त्यांनी केला आहे.
शिवसेना नेते उदय सामंत यांनी सांगितले की, राज्य मंत्रिमंडळ स्थापन झाले असून मुख्यमंत्री आणि दोन उपमुख्यमंत्र्यांच्या नेतृत्त्वाखाली काम सुरू आहे. मीडियातून 14 तारखेला मंत्रिमंडळ विस्तार होणार असल्याची चर्चा आहे, आणि त्याबद्दल त्यांना शुभेच्छा आहेत. मंत्र्यांच्या निवडीचा निर्णय एकनाथ शिंदे यांच्याकडे आहे, आणि कोणाला कोणतं खातं मिळेल याबाबतचा सस्पेन्स काही दिवस राखला जाईल. त्यांनी स्पष्ट केले की, गृह खात्याबाबत कोणतीही चर्चा अडलेली नाही आणि मंत्रिपदाचे वाटप सन्मानपूर्वक होईल.
दरम्यान, शिवसेना नेते उदय सामंत यांनी शरद पवार यांच्या ममता बॅनर्जी यांच्याकडे इंडिया आघाडीचं नेतृत्व देण्याच्या विधानावर प्रतिक्रिया दिली. सामंत यांनी सांगितले की, शरद पवार यांचे हे विधान काँग्रेसचा अपमान आहे. राहुल गांधी यांच्या नेतृत्वाखाली निवडणुका यशस्वी होत नाहीत. एवढच नाही तर त्यांनी दावा केला की, राहुल गांधी यांचे नेतृत्व कमकुवत आहे आणि महाविकास आघाडीचं नेतृत्व यावर प्रकाश टाकत आहे.
