महाराष्ट्रात महायुतीला मोठे बहुमत मिळून दहा दिवस झाले तरी सरकार स्थापन झालं नाही. आता अखेर महाराष्ट्राच्या नव्या सरकारचा शपथविधी सोहळा ५ डिसेंबर रोजी मुंबईतील आझाद मैदानात होणार आहे, जिथे मुख्यमंत्री आणि दोन डेप्युटी सीएम शपथ घेतील. पंतप्रधान नरेंद्र मोदी खास या सोहळ्याला उपस्थित राहणार आहेत. यापूर्वी भाजपाच्या विधीमंडळ पक्षाची बैठक होणार असून, केंद्रीय अर्थमंत्री निर्मला सीतारमण आणि गुजरातचे माजी मुख्यमंत्री विजय रुपाणी यांना केंद्रीय निरीक्षक म्हणून महाराष्ट्रात पाठविण्यात आले आहे. यामध्ये भाजपच्या विधीमंडळ पक्ष नेत्यांची निवड केली जाणार आहे आणि त्यानंतर मुख्यमंत्र्यांच्या नावाची घोषणा होणार आहे.
महायुतीच्या तीन घटक पक्षांच्या नेत्यांची देवेंद्र फडणवीस, एकनाथ शिंदे आणि अजित पवार यांच्याशी मुंबईत बैठक होणार आहे. नव्या मुख्यमंत्र्यांच्या नावावर आणि मंत्रिमंडळातील सदस्यांच्या नावावर सहमती मिळवली जाणार आहे. मात्र एकनाथ शिंदे यांची प्रकृती ठीक नसल्याने त्यांना ठाण्याच्या ज्युपिटर रुग्णालयात दाखल केले आहे. त्यांना ताप, कमजोरी, आणि घशाचा संसर्ग झाला आहे, तसेच पांढऱ्या पेशींची संख्या वाढली आहे. यामुळे बैठका पुढे ढकलण्यात आल्या आहेत.
महाराष्ट्राच्या मुख्यमंत्री पदावर महायुतीत एकनाथ शिंदे आणि देवेंद्र फडणवीस यांच्यात स्पर्धा निर्माण झाली आहे. एकनाथ शिंदे यांना मुख्यमंत्री पद परत मिळवायचं आहे, मात्र भाजपाच्या पक्षश्रेष्ठींनी त्यासाठी नकार देत, यंदा मुख्यमंत्री भाजपाचा होणार असं स्पष्ट केलं आहे. त्यामुळे, मुख्यमंत्री पदाच्या बदल्यात एकनाथ शिंदे यांनी गृहमंत्रीपद किंवा इतर मोठं पद मिळवण्याची मागणी केली आहे. आता सर्वांचं लक्ष एकनाथ शिंदे यांच्या नाराजगीवर आणि भाजपाचे पक्षश्रेष्ठी त्यावर कसं उत्तर देतात याकडे लागले आहे.
